Sorzabalek 2001ean aitortu zituen delituak torturen ondorioz onartuak izan zirela adierazi du Audientzia Nazionalak. Hala, bere kontrako karguak deuseztatu ditu instituzioak.
Iratxe Sorzabalen alde Donostian egindako elkarteratzea (Angula Berriaren argazkia CC)
Espainiako Auzitegi Nazionalak Iratxe Sorzabal errugabetzat jo du, «tratu gizagabeak» jasan zituela aitortuta. 2001ean atxilotu zutenean egindako autoinkulpazioa, epaimahaiaren arabera, torturapean eskuratua izan zen, eta, ondorioz, «bere kontrako probarik ez dagoela» ebatzi dute. Epaiak jasotzen du Sorzabal inkomunikatuta eduki zutela bost egunez, eta tarte horretan elektrodoen bidezko torturak jasan zituela. Espainiako Poliziak 2001eko martxoan atxilotu zuen, beste atxilotu baten deklarazioan haren izena agertu ostean. Hala, Sorzabalen hitzetan, «Guardia Zibilak atxilotu orduko hasi ziren torturak».
Epaimahaiak adierazi duenez, «Kantada» deklarazioaren barruan egindako autoinkulpazioa «elektrodoak aplikatzearen ondorioz» egin zen, eta hori horrela izanik, baliogabetzat jo du epaitegiak. Deklarazio hori gabe, alabaina, akusatuaren aurkako probarik ez dagoela azpimarratu dute instituziotik. 2017an «Istanbulgo Protokoloa», alegia, torturak eta tratu txarrak ikertzeko Nazio Batuen protokoloa aplikatu zitzaion, 2001eko aipamenak torturapean egin ote zituen argitzeko asmoz. Protokolo honek gobernuak derrigortzen ditu pertsonek izan ditzaketen tortura zantzuak ikertzera. Bere azalean elektrizitateak utzitako aztarnak izan dira ondorio horretara heltzeko kausa nagusia. Absoluzioa Fernando Andreu aretoko presidenteak, Ana Revuelta eta Javier Mariano Ballesteros epaileek sinatu dute. Hauxe da urte honetan Sorzabalek jasotzen duen bigarren absoluzioa, Alacanteko aireportuko atentatuaren auzian ere errugabea jo baitzuten apirilean.
